જો ક્રિએટર્સ અને સોશિયલ મીડિયા સ્ટાર્સને યુટ્યુબ કરતાં X પર વધુ પૈસા મળવા લાગે તો શું થાય? હકીકતમાં, એલન મસ્કે આ અંગે સ્પષ્ટ સંકેતો આપ્યા છે. તેમણે X પર પોસ્ટ કરીને સૂચવ્યું હતું કે સર્જકોને યુટ્યુબ કરતાં પ્રતિ વપરાશકર્તા વધુ ચૂકવણી કરવી જોઈએ. જેથી સારા સર્જકો X તરફ આકર્ષાય. ત્યારબાદ મસ્કે પોસ્ટનો જવાબ આપતા કહ્યું કે તેઓ આ પર કામ કરશે.

એલન મસ્ક યુટ્યુબ સાથે સ્પર્ધા કરવા માટે કટિબદ્ધ છે. મસ્કે તેમના સોશિયલ મીડિયા પ્લેટફોર્મ, X પર સર્જકોને વધુ ચૂકવણી કરવાના વિચારને સમર્થન આપ્યું છે. તેમનું કહેવું છે કે સર્જકો સાથે ન્યાયી વર્તન થવું જોઈએ. મસ્કે આ નિવેદન એક પોસ્ટના જવાબમાં આપ્યું હતું. જેમાં સૂચવવામાં આવ્યું હતું કે X એ યુટ્યુબ કરતાં વધુ ચૂકવણી કરવી જોઈએ. જેથી ઉત્તમ અને મૌલિક સામગ્રી બનાવનારા સર્જકો પ્લેટફોર્મ તરફ આકર્ષાય. જો આવું થાય, તો X એક ઉચ્ચ કક્ષાના સોશિયલ મીડિયા પ્લેટફોર્મ અને સર્જકો માટે આવકનો સ્ત્રોત બની શકે છે.